काठमाडौं महानगरपालिकाले थाल्यो एसईई पूरक परीक्षाको तयारी कक्षा

काठमाडौं।  काठमाडौं महानगरपालिकाले आजदेखि एसईई पूरक परीक्षाको तयारी कक्षा सुरु गरेको छ। २०८० सालको एसईईमा नियमित परीक्षामा ग्रेड वृद्धि पाउन नसकेका ८७३ विद्यार्थीका लागि यो कक्षा सञ्चालन गरिएको हो।

सहरी योजना आयोगका सदस्य इन्जिनियर शैलेन्द्र झा भन्छन्, “विद्यार्थीहरूलाई स्रोत केन्द्रमा क्याम्प राखेर कक्षा सुरु गरिएको हो। यी कक्षाहरु पास गराउनमा भन्दा पास गराउने वातावरण तयार गर्नका लागि सञ्चालन गरिएका हुन्।”

उनले थपे, “पास गराउन पाठ पढाइन्छ। पास गराउने वातावरण तयार पार्दा विद्यार्थीलाई पाठ पढाउनुका साथै सिकाइप्रति उत्साहित गरिन्छ। केही बिग्रिएको छैन भनेर प्रोत्साहित गरिन्छ।”

विद्यार्थीहरूलाई स्वच्छ खानाको प्रबन्ध गरिएको छ र १०० शिक्षकको रोष्टर बनाएर कक्षा सञ्चालन थालिएको छ। कक्षामा व्यक्तिगत परामर्श, पियर लर्निङ (दुई जनाबीचको अन्तरक्रियात्मक सिकाइ) र समूहगत सिकाइ जस्ता विधि अपनाएर कक्षा सञ्चालन हुनेछन्।

सचिवालय सल्लाहकार सस्मित पोखरेल भन्छिन्, “यो महानगरपालिकाका लागि पनि परीक्षा हो। विद्यार्थीहरू जुन विषयमा अनुत्तीर्ण भए, उनीहरूलाई त्यो विषय कठिन लागेकोले अनुत्तीर्ण भएका हुन्। यही कठिन विषयमा उनीहरूलाई रुचि जगाउनु छ, अध्ययन गराउनु प्रेरित गर्नु छ, र यसमा ग्रेड वृद्धि गराउनु छ। यस कारण यो महानगरपालिकाका लागि पनि परीक्षा हो, र यो परीक्षा जसरी पनि उत्तीर्ण गर्नु पर्नेछ।”