एनपीएल : विजेताले १ करोड ११ लाख रुपैयाँ पुरस्कार पाउने
काठमाडौँ। सिद्धार्थ बैंक नेपाल प्रिमियर लिग (एनपीएल) को विजेताले १ करोड ११ लाख रुपैयाँ पुरस्कार पाउने भएको छ।
शनिबार कीर्तिपुरस्थित त्रिवि क्रिकेट मैदानमा एनपिएल उद्घाटन क्रममा आयोजक नेपाल क्रिकेट संघ (क्यान) ले विजेताको पुरस्कार राशि घोषणा गरेको हो।
जसअनुसार विजेताले १ करोड १० लाख पाउनेछ भने उपविजेताले ५० लाख पुरस्कार प्राप्त गर्नेछ।
यस्तै तेस्रो हुनेलाई ३० लाख र चौथो हुने टोलीलाई २० लाख रुपैयाँ प्रदान गरिने क्यानले जनाएको छ।
अहिले उद्घाटन खेलमा जनकपुर बोल्टस् र विराटनगर किंग्स भिडिरहेका छन्।
एनपीएलमा जनकपुर र विराटनगरसँगै पोखरा एभेन्जर्स, काठमाडौँ गुर्खाज, सुदूरपश्चिम रोयल्स, चितवन राइनोज्, लुम्बिनी लायन्स र कर्णाली याक्स गरी ८ फ्रेन्चाइज टोली सहभागी छन्।
